माणूस हा समाजप्रिय प्राणी आहे, असे आपण म्हणतो; मात्र, आजच्या धावपळीच्या आणि स्पर्धेच्या सोशल मीडियाच्या युगात माणसाचा स्वतःशी, कुटुंबाशी आणि समाजाशी असलेला संवाद कुठेतरी हरवत चालला आहे. नातेसंबंधांमधील गुंतागुंत, बदलती जीवनशैली, वाढत चाललेली स्पर्धा आणि सामाजिक कढी-परंपरांचा प्रभाव यामुळे निर्माण होणाऱ्या प्रश्नांना सकारात्मकरित्या कसे हाताळायचे, याचे मार्गदर्शन करणे ही काळाची गरज बनली आहे.

आमचे मित्र श्री. सलील जव्हेरी यांनी स्वानुभवावर लिहिलेले 'समानता सामाजिक विचारांची' हे पुस्तक केवळ विचारांचे संकलन नसून, सुदृढ समाजनिर्मितीसाठी मांडलेला एक बहुस्तरीय दृष्टिकोन आहे. या पुस्तकाची व्याप्ती बालपणापासून वृद्धत्वापर्यंत आणि वैयक्तिक यशापासून सामाजिक जबाबदारीपर्यंत पसरलेली आहे.

या पुस्तकात मुलगा-मुलगी भेदभाव, हुंडाबळी, कन्यादान आणि लग्न यांसारख्या परंपरांवर विवेचन करून सामाजिक वास्तवाचे दर्शन घडवण्यात आले आहे. पती-पत्नीमधील अपेक्षा, संवेदनशीलता आणि समानता या बाबींवर भर देऊन वैवाहिक आयुष्य सुखी करण्याचे मार्ग सुचवले आहेत.

या पुस्तकाचे सर्वात महत्त्वाचे वैशिष्ट्य म्हणजे 'समुपदेशन'. विद्यार्थी, पालक आणि कुटुंब यांना विविध स्तरांवर मार्गदर्शन करून माणसाच्या मनाचे आरोग्य जपण्याचा प्रयत्न केला गेला आहे. ट्रॅफिक सिग्नल, स्वच्छता आणि सामाजिक कार्यक्रमांसारख्या विषयांवर एक जबाबदार नागरिक घडवण्याचे सूत्र मांडले आहे.

आयुष्याच्या शेवटच्या टप्प्यावरही 'देहदान' सारख्या थोर संकल्पनेतून समाजाचे ऋण कसे फेडता येईल, याचे प्रेरणादायी विवेचन या पुस्तकात आहे.

हे पुस्तक वाचक, विद्यार्थी, पालक आणि समाजातील प्रत्येक घटकाला अंतर्मुख करायला लावणारे आहे. आयुष्यातील छोट्या-छोट्या गोष्टींकडे सकारात्मक दृष्टिकोन ठेवून आपण एक चांगला आणि सुसंस्कृत समाज घडवू शकतो, हा विश्वास हे पुस्तक देते. वाचकांना हे पुस्तक त्यांच्या जीवनप्रवासात नक्कीच मार्गदर्शक ठरेल, याची मला खात्री आहे.